Ўзбекистоннинг беш карра чемпиони Тошкентнинг “Бунёдкор” жамоаси замон билан ҳамнафас қадам ташлаб, юқори мақсадлар сари интилишда давом этмоқда. “Қалдирғочлар” куни кеча энг сўнгги футбол технологияларини ўз ичига қамраб олган “InStat” компанияси билан ҳамкорлик ўрнатди.

“InStat” - футбол учрашувларининг чуқур ва кенг таҳлили, футболчилар ҳатти-ҳаракатларининг илмий ва видеотасвир хулосалари, жисмоний кўрсаткичлари ва бошқа бир қанча фойдали маълумотларни аниқлайдиган компания ҳисобланади.

- “InStat” биз мураббийларга футболчиларимиз қандай ўйин кўрсатгани ва учрашув давомида қайд этган барча кўрсаткичлари ҳақида батафсил маълумот беради. Ҳар бир футболчининг ҳатти-ҳаракатида ижобий ўзгариш қилишга ва буни рақамларда акс эттиришга, қолверса навбатдаги машғулотларда нималар устида кўпроқ ишлашимишни аниқ кўрсатиб беради. “InStat” туфайли “Бунёдкор” футбол мактабида таҳсил олаётган ёш футболчиларнинг малакасини янада ошириш ва уларни мукаммал футболчи сифатида тарбиялаш учун қўшимча имкониятлар пайдо бўлди, - дейди “Бунёдкор” ФК бош мураббийи Сергей Лушчан.

- “InStat” – бу энг аввало барча жамоалар ва футболчилар ҳақида аниқ маълумотлар базасидир. Ахборот ва таҳлиллар тизимининг тезкорлиги ва қулайлиги бу катта ютуқдир, - “Бунёдкор” ФК бош директори Бахтиёр Бобоев.