УЕФА расмий сайти Антонин Паненка томонидан тепилган машҳур пенальтининг 40 йиллиги ҳақида хабар берди.

Чехословакиялик футболчи Евро-1976 финалида ГФР дарвозасига ҳал қилувчи пенальтидан гол уриб, жамоасини Европа чемпионати ғолибига айлантирган эди.

Паненка тўпни баландлатиб, оҳиста тепиб, марказдан дарвозага йўллаган ва чап бурчакка ташланган дарвозабон Зепп Майерни доғда қолдирган эди. Ўйиннинг асосий вақти 2:2 ҳисобида якунланган, пенальтилар сериясида Чехословакия 5:3 ҳисобида ғалаба қозонган эди.

Бундай услубда пенальтини амалга ошириш шундан бери “Паненка услуби” деб номланган.