Бразилиянинг Манаус шаҳрига Олимпиада машъаласининг етиб келиши муносабати билан уюштирилган тадбирда Жума лақабли чипор ягуар ҳам иштирок этди.
Тадбир тугагач, ягуар қочиб кетишга муваффақ бўлди. Шундан сўнг ҳарбийлар уни отиб ўлдиришдан бошқа чора топа олишмади.
"Ягуарни ҳайвонот боғига олиб бориш чоғида, у қочиб кетди. Биз уни ухлатадиган дори солинган ўқ билан отдик. Бироқ дори таъсир қилмади шекилли, ягуар унга яқинлашган одамга ташланиб қолди. Шунда уни отиб ўлдиришга мажбур бўлдик. Бу бахтсиз ҳодиса, бундан қайғудамиз” - деди полковник Луис Густаву Эвелин, тадбир иштирокчиларидан бири.
Ягуар Бразилия олимпия терма жамоасининг расмий тимсоли саналади. XXXI ёзги олимпия ўйинлари 5 – 21 август кунлари Рио-де-Жанейро шаҳрида бўлиб ўтади.
