Шу йилнинг 15 сентябрь — 2 октябрь саналари давомида Ҳиндистонда бўлиб ўтадиган 16 ёшгача бўлган ўсмир футболчилар ўртасидаги Осиё чемпионатида ишлайдиган ҳакамлар маълум қилинди.

Осиё футбол конфедерацияси томонидан ушбу мусобақа учун тайинланган ҳакамлар рўйхатидан ўзбекистонлик ФИФА рефериси Азиз Асимов ҳамда Руслан Серзитдинов ҳам ўрин олган.

Таъкидлаш керакки, Осиё чемпионатида Ўзбекистон ўсмирлар терма жамоаси ҳам иштирок этади.

Ўзбекистон ўсмирлар терма жамоаси Осиё чемпионатига финал босқичига ташланган қуръа натижасига кўра КХДР, Таиланд ҳамда Яман жамоалари билан бир гуруҳдан ўрин олган.

Олимхўжаев шогирдлари турнирни 17 сентябрь куни Таиландга қарши ўйин билан бошлайди. 20 сентябрда Яман ва 23 сентябрь куни эса КХДРга қарши майдонга тушади.

Қитъа биринчилигига тайёргарлик жараёнини олиб бораётган Ўзбекистон U-16 терма жамоаси Минск шаҳрига жўнаб кетди. Ўзбекистон U-16 терма жамоаси ушбу йиғин доирасида Беларусь билан иккита ўртоқлик учрашуви ўтказади.

Ҳар икки ўйин Минск шаҳрида бўлиб ўтади. Жамоанинг Беларусга қарши ўртоқлик учрашувларининг дастлабкиси 25 июнда бўлса, иккинчи ўйин 27 июнь санасига белгиланган. Ҳар икки учрашув маҳаллий вақт билан 18:00да бошланиши белгилаб қўйилган.