Бугундан Европа чемпионатида плей-офф баҳслари бошланади. Мухлисларни бугун оқшомда 3та баҳс кутиб турибди. Учрашувларга қисқача превью шаклида тўхталиб ўтамиз.

Буюк Британия қироллигидан фақат Шотландия Евро-2016 йўлланмасини қўлга кирита олмади. Қолган 3та терма жамоа Францияга ташриф буюрди ва уларнинг барчаси нимчорак финалга йўл олди.

Умуман олганда, ўз тарихида илк марта қитъа чемпионатида иштирок этаётган Шимолий Ирландияни ҳеч ким жиддий қабул қилмаганди. Улар эса Украинани мағлуб этиш ҳисобига плей-оффга чиқишга муваффақ бўлишди.

Уэльс эса мураккаб гуруҳдан 1-ўринни банд этди. Бэйл жамоадошлари Словакия ва Россияни мағлуб этиб, Англияга сўнгги дақиқаларда имкониятни бой беришди. Уэльсликлар бу билан тўхтаб қолмоқчи эмаслар. Жамоа чорак финалга, ҳаттоки ярим финалга чиқиш учун яхши имкониятга эга. Чорак финалда Уэльс-Шимолий Ирландия жуфтлиги ғолибига Венгрия – Бельгия жуфтлиги ғолиби тўқнаш келади.

Уэльс терма жамоасига таъриф берарканмиз, жамоа икки юлдуз (Бэйл ва Рэмзи) ҳамда 9 нафар жангчидан иборатлигини таъкидлаш лозим. Ҳозирча бу йигитларнинг меҳнати самара келтирмоқда.

Евро-2016. Нимчорак финал
21:00. УЭЛЬС - ШИМОЛИЙ ИРЛАНДИЯ
Имкониятлар — 60-40