Аргентина терма жамоаси ҳужумчиси Лионель Мессининг Америка Кубоги финалида Чилидан учралган мағлубиятдан кейинги сўзлари кўпчилик учун кутилмаган бўлиб чиқди.  

«Барселона» аъзоси бўлган футболчи Аргентина терма жамоасини тарк этиши ҳақида эълон қилди.

Мессининг бу қарорига аргентиналиклар дарвозабони Серхио Ромеро муносабат билдириб ўтди.

«Биз оёққа туришимиз ва келажакка умид билан қарашимиз керак. Мен Аргентина терма жамоасини Мессисиз тасаввур қила олмайман. Месси бу гапларини терма жамоа соврин ютиш имкониятини қўлдан чиқарганидан кейинги ҳиссиётлари ичида айтиб юборди», — дея Ромеронинг сўзларини келтиради Marca.

Ўйиннинг асосий вақти ва қўшимча бўлимларда ҳисоб очилмади. Шундан сўнг бошланган пенальтилар сериясида Чили 4:2 ҳисобида ғалаба қозонди. «Альбиселесте» сафида зарба беришда адашган футболчилардан бири Лионель Месси бўлди, у тепган тўп дарвоза тўсини устидан ўтиб кетди.