Биринчи лига баҳслари тобора қизғин паллага кириб бораркан, ўз олдига муайян вазифа ва мақсад қўйган жамоалар кўзга ташлана бошлади. Ўз навбатида, аутсайдерлар номи ҳам ойдинлашиб бормоқда. Лиганинг мунтазам иштирокчиси «NBU-Осиё» барқарор ўйин намойиш этиб, бирин-кетин очколар тўпламоқда. Бунда бош мураббий Руфат Акрамхўжаевнинг ҳиссаси катта, албатта. Хўш, жорий мавсум жамоа кўрсатаётган ўйин ва натижалар ушбу мутахассисга манзур келяптими? «Банкирлар» устози билан суҳбат қуриш чоғида ушбу саволга ҳам жавоб топишга уриндик.
- Жорий мавсум «NBU-Осиё» кўрсатаётган ўйин бош мураббий сифатида сизда қандай таассурот қолдирмоқда?
- Ортда қолган турларга қараб хулоса қилишим мумкин, жамоа ёмон ўйнамаяпти. Мавсум бошида таркибни ёшартиришга катта эътибор қаратдик. Бундан кўзланган асосий мақсад иқтидорли ёшларни кашф қилиб, уларга кўпроқ имконият берган ҳолда, элита жамоалари сафини тўлдиришга муносиб бўлган футболчиларни етказиб бериш эди. Биласизми, бунчалик ёш таркиб «банкирлар» тарихида ҳали учрамаган. Бир пайтлари футболчи сифатида «NBU-Осиё»да ўйнаганимда, ёшлар камчиликни ташкил қилишган. Мураббийлар асосан тажрибали футболчилар хизматидан фойдаланишарди. Бу йилги кўрсаткичларимиз борасида тўхталадиган бўлсам, ҳозирча натижалар ёмон эмас. Таркиб ёш эканлигига қарамай, вазият биз учун ижобий тус олмоқда. Шуниси мени қувонтирмоқда.
- Барқарорлик етишмаслиги хусусида нималар дея оласиз? Чунки жамоага яққол фаворит сифатида қаралган учрашувларда очко йўқотилмоқда. Аксинча, кучли жамоалар билан тўқнашувларда «NBU-Осиё» зафар қучмоқда...
- Тажриба йўқлиги сезилмоқда. Боя айтиб ўтганимдек, жамоамиз таркиби асосан ёшлардан иборат эканлигини ПФЛга берган «заявка»миз орқали ҳам англаб олиш қийин эмас. Айрим футболчиларимизда ўйин амалиёти кам эканлиги туфайли, барқарор ўйин кўрсатишга қийналмоқдалар.
- Биринчи даврадан кейин клубда қандай ўзгаришлар бўлади?
- Буни вақт кўрсатади. Ҳозирча олдимизда қолган ўйинларни муваффақиятли ўтказиш вазифаси турибди. Вазиятга қараб, таркибни шакллантириб бораверамиз.
- Ўзингиздаги ўзгаришларга тўхталсак, тажрибангиз ошаётгани сезиляптими?
- Албатта, сезилмоқда. Биринчи лигада ўйинлар сони кўп. Футболчиларни ҳар бир баҳсга тайёрлар экансиз, ўзингиздаги ютуқ ва камчиликларни таҳлил қилиб бориш имконияти туғилади. Менда шу жиҳат кўзга ташлана бошлади. Қолаверса, бир қатор тажрибали мураббийлар билан елкама-елка иш юритаётганим ҳам мен учун ютуқдир.
- Жамоа биринчи лигада мунтазам равишда иштирок этишга одатланган. Хўш, шароитлар ҳам шунга монанд яратилганми?
- Биринчи лига ҳолатидан келиб чиқиб айтадиган бўлсам, шароитларимиз аъло даражада. Тўғри, футболчиларимиз катта миқдорда пул олишмайди. Лекин мунтазам равишда меҳнатларига яраша рағбатлантириладилар. Буни жамоада илгари ўйнаган футболчилар ҳам тасдиқлашлари мумкин. Маош камтарона бўлишига қарамай, узилишлар деярли кузатилмайди.
- «NBU-Осиё» вақтинча ЖАРдаги қўшимча майдонда тўп суряпти. Жамоа ўз стадионига қачон қайтади?
- Иккинчи давра ўйинлари бошлангач, ўз аренамизга қайтамиз. У ерда маълум муддат олиб борилган таъмирлаш ишлари ҳозирга келиб якунланиш арафасида. Насиб қилса, лиганинг кейинги учрашувларини ўз уйимизда ўтказамиз.
- Евро-2016 мусобақасини кузатяпсизми?
- Албатта, турнирнинг ҳар бир учрашувини катта қизиқиш билан томоша қиляпман.
- Хўш, илк турдан кейинги таассуротлар қандай?
- Рости, дастлабки баҳслардан кейин аниқ фикр билдириш мушкул. Яққол фаворитлар кўзга ташланганича йўқ. Негаки, ҳар қандай мусобақанинг дастлабки турларида кутган ўйинингиз чиқмаслиги мумкин. Шу боис, келгуси учрашувлар янада қизиқарли кечади. Мураббий сифатида терма жамоаларнинг турнирга тайёргарлиги, мураббийлар штаби танлаган тактикаларга диққат билан эътибор қаратяпман. Бу орқали қандайдир услубни ўзлаштирсам, ўзим учун фойдали бўлиши турган гап.
- Қайси жамоага мухлислик қиляпсиз?
- Мезбон - Франция термасига. Ўйлайманки, улар финалга қадар етиб боришади.
- Америка кубогида фаворитлар - Бразилия ва Уругвайнинг гуруҳда қолиб кетишига сизнингча, нима сабаб бўлди?
- Бунга яққол сабабни кўрсатиш қийин. Менимча, бу терма жамоа футболчилари Европада тўп суришлари боис, чарчоқ аломатлари ўз таъсирини ўтказгандир. Ҳар ҳолда мен шундай фикрдаман.
Иззатбек АБДУВАҲОБОВ
