Польша терма жамоаси бош мураббийи Адам Навалка Евро-2016 чоракфинали доирасидаги Португалияга қарши ўйиндан олдин ўз фикрларини билдирди. Жумладан у ҳали бирор марта гол уролмаган Роберт Левандовски ўйинига ҳам баҳо берди.
«Роберт биз учун муҳим футболчидир. Унинг ўйинидан мамнунман. У сардор ва ҳужумчи сифатида жамоада катта роль ўйнайди, майдондаги вазифасини яхши бажаради, бошқаларни илҳомлантиради.
Унинг жисмоний ва руҳий ҳолати яхши, ишончим комил, у бизга жуда кўп фойда келтиради. Ҳар бир ўйинда уни икки, уч футболчи қўриқламоқда, унга нисбатан қўпол ўйнашмоқда, бироқ бу тўсиқлардан муваффақиятли ўтиб келмоқда.
Португалия терма жамоаси ҳақида яхши фикрдамиз. Уларнинг имконияти юқори, ҳужум қилишни ёқтиришади, ҳимояда ҳам яхши ҳаракат қилишади. Бир футболчи ўйин тақдирини ҳал қилолмайди. Шунинг учун ҳам фақат Роналдуни эмас, бутун жамоани яхши қўриқлашимиз лозим.
Бу биз учун жуда муҳим ўйин. Муваффақиятлар футболчиларимизни илҳомлантирмоқда ва улар бундан ҳам юқори марраларни кўзлашмоқда. Биз ўйиннинг ижобий натижасига ишонамиз», – деди Навалка.
