Грузиянинг Тбилиси шаҳрида йигирма ёшгача бўлган атлетлар ўртасида ўтган жаҳон чемпионатида терма жамоамиз аъзолари битта олтин, учтадан кумуш ва бронза медаль билан тақдирланди.

Нуфузли мусобақа ғолиб ва совриндорларини Тошкент халқаро аэропортида Ўзбекистон оғир атлетика федерацияси ва спорт жамоатчилиги вакиллари, оммавий ахборот воситалари ходимлари кутиб олди.

Президентимиз Ислом Каримов раҳнамолигида ҳар томонлама баркамол авлодни вояга етказишнинг муҳим воситаси сифатида жисмоний тарбия ва спортни ривожлантиришга алоҳида эътибор қаратилмоқда. Бунинг самарасида мамлакатимиз спортчилари нуфузли мусобақаларда юқори натижаларга эришмоқда.

Йигирма ёшгача бўлган атлетлар ўртасидаги жаҳон чемпионатида ёшларимиз муваффақиятли иштирок этиб, ўзбек спортчилари ҳеч кимдан кам эмаслигини яна бир бор исботлади.

Дунёнинг 47 давлатидан 250 дан зиёд спортчи иштирок этган чемпионатда иқтидорли полвонимиз Фарҳод Собиров вазни 94 килограммгача бўлган атлетлар баҳсида иккикураш якуни бўйича 373 килограмм натижа қайд этиб, биринчи ўринни эгаллади. Полвонимиз штангани даст кўтаришда 170 килограмм, силтаб кўтаришда эса 203 килограмм натижа билан иккита кумуш медалга ҳам эга бўлди.

Вазни 77 килограммгача бўлган спортчилар ўртасидаги беллашувларда қатнашган Шаҳзод Худойберганов штангани силтаб кўтаришда 184 килограмм натижа билан кумуш медални қўлга киритди.

Вазни 58 килограммгача бўлган қизлар баҳсида Муаттар Набиева штангани даст кўтаришда 95 килограмм, силтаб кўтаришда 112 килограмм, иккикураш якунига кўра, 207 килограмм маррани забт этиб, учта бронза медални қўлга киритди.

– Биз эришаётган бундай муваффақиятлар замирида Президентимиз раҳнамолигида ёшларнинг ўз истеъдодини рўёбга чиқариши учун яратилаётган шароит ва имкониятлар мужассам, – дейди Фарҳод Собиров. – Мақсадимиз Ватанимиз шарафини халқаро миқёсда янада улуғлаш ва Президентимизнинг, халқимизнинг ишончини оқлашдир.