"Навбаҳор" ёшлари айни пайтда иккинчи даврага тайёргарликни Наманганда олиб боришмоқда, дея хабар беради клуб расмий сайти.

Ёшлар жамоаси мураббийлар штабида айрим ўзгаришлар рўй берганлигини айтиб ўтиш жоиз. Эндиликда жамоа ёшлари билан Мустафо Байрамов иш олиб боради. Унга Дурбек Умаралиев ва Шерзод Жўраевлар ёрдам беришади. Давралар оралиғида “Навбаҳор”га ўтган Рустам Дўрмонов эса селекционер мураббий сифатида иш юритадиган бўлди.

Мураббийлар давралар оралиғида таркибга бир қатор иқтидорли ёшларни жалб этишни мақсад қилишган. Айни пайтда мураббийлар штаби “Навбаҳор-Умид” футбол мактабидан етишиб чиқаётган ва вилоятдаги бошқа футбол мактабларида таҳсил олаётган иқтидорли ёшларни синовдан ўтказишмоқда. Айнан шу мақсадда назорат ўйинлари ташкил этилиб, улар орасидан муносибларини саралаб олинмоқда. Учрашувларда ўзини кўрсатган ёшлар иккинчи даврада “Навбаҳор” сафида майдонга тушиш имкониятига эга бўлишади.