Швейцария терма жамоаси футболчиси Жердан Шакирининг Польша терма жамоаси дарвозасига урган голи экспертлар томонидан Евро-2016 мусобақасининг энг чиройли голи деб топилди, дея хабар беради УЕФА расмий сайти.
Экспертлар овоз беришида 13та мутахассис - собиқ футболчи ва мураббийлар, жумладан, Фергюсон, Ален Жиресс, Дэвид Мойес, Саво Милошевич, Гарет Саутгейт ва Томас Шааф, шунингдек, ФИФА техник қўмитаси аъзоси Иоан Лупеску бор эди.
"Овоз бериш жараёнида кўплаб критерийларни ҳисобга олдик. Шунингдек, берилган зарбанинг мураккаблиги ва голнинг аҳамияти. Чиройли голлар, аммо биз учун тасодифдай кўринганлари рейтингга кирмади. Айнан шунинг учун Шакирининг голини энг яхши деб топдик", - дейди Лупеску.
Мухлислар овозига кўра мусобақанинг энг чиройли голи деб Венгрия термаси футболчиси Золтан Геранинг Португалияга урган голи топилган эди. Бу гол экспертларнинг кучли ўнлигига ҳам кирмади.
