Кураш бўйича анъанавий «Маҳалламиз паҳлавонлари» мусобақасининг Тошкент шаҳар босқичи бўлиб ўтди.

«Маҳалла» хайрия жамоат фонди ташаббуси билан Тошкент шаҳар маданият ва спорт ишлари бош бошқармаси, «Камолот» ёшлар ижтимоий ҳаракати Тошкент шаҳар кенгаши ҳамкорлигида ташкил этилган мазкур мусобақада юздан ортиқ ўғил-қиз ўзаро куч синашди.

Ўғил болалар ўртасидаги беллашувларда Бунёд Султонбоев, Дониёр Баҳодиров, Шамс Имомназаров ўз вазн тоифасида ғолибликни қўлга киритди. Қизлар баҳсида Диёра Обитова, Камола Ҳусниддинова ҳамда Шоҳиста Маҳмудова олтин медалга сазовор бўлди.

– Беллашувлар давомида миллий спортимизга бўлган қизиқишим янада ортди, янги-янги усулларни ўргандим, – дейди Шамс Имомназаров. – Энг муҳими, кўплаб дўстлар орттирдим. Мақсадим келгусида ўз устимда кўпроқ ишлаб, Ватанимиз довруғини халқаро майдонларда янада оширишдир.