Бугун, 2 август куни "Локомотив" футбол клуби иккинчи давра олдидан ўз сафига қўшиб олган футболчиларнинг тақдимот маросимини ўтказди.

Тақдимот маросимида Артур Геворкянга 71-рақамли футболка тақдим этилди. Шундан сўнг футболчи ўз фикрлари билан ўртоқлашди.

— "Локомотив"дан таклиф тушди ва мен бу таклифни қабул қилдим. Бу жамоага ўтишим ёқимли бўлди. Машғулотларда фаол иштирок этишга ҳаракат қилдим. Жамоадаги барча футболчилар билан яхши таниш эдим. Шу боис, жамоага мослашишим қийин кечмади.

Ҳа, мен "Насаф"да етакчи эдим, бу ерда ҳам ўз ўйиним билан клубга ёрдам беришга ҳаракат қиламан.

Нима учун 71-рақамни танладим? Умуман олганда, танлаш имконияти камроқ эди. Хабарингиз бор, фаолиятим давомида асосан 17-рақамда ўйнаганман. 71 эса 17нинг тескариси бўлгани учун, унда "1" ва "7" рақамлари борлиги учун шу рақамни танладим. Умуман олганда, рақамнинг мен учун катта аҳамияти йўқ.

"Ал-Айн"га қарши кечадиган ўйин ҳақида нима дейишим мумкин? Биз бу жамоани яхши биламиз. Ўйлайманки, ҳозирги пайтда "Локомотив" "Ал-Айн"га нисбатан кучлироқ. Ҳам футболчиларнинг савияси, ҳам ўйин борасида. "Насаф" сафида бу жамоага қарши иккита ўйинда иштирок этдим. Қаршида дуранг ўйнаган бўлсак, сафарда ютқаздик. Биз бу жамоани Қаршида ютишимиз ҳам мумкин эди. Бу футбол. Бўлажак ўйинларга яхши тайёргарлик кўрсак, бу жамоадан ўта оламиз деб ўйлайман. Умуман олганда, "Локомотив" бирданига 3та мусобақада иштирок этмоқда. Уларнинг барчасида муваффақиятли иштирок этишни мақсад қилган.