Андижонда чемпионат аутсайдери «Андижон» клуби билан «Пахтакор» куч синашди. Андижонликлар сўнгги ўринда бораётган бўлишига қарамай номдор рақибга жиддий қаршилик кўрсатиб, кутилмаганда ғалабани илиб кетишди.

Давралар оралиғида таркибни кучайтира олган мезбонлар ўйин давомида бироз ташаббусга эга бўлишди. Лекин хавфли вазиятлар ҳар иккала жамоа дарвозаси олдида ҳам юзага келиб турди. Баъзан дарвозабонлар маҳорати, баъзан ҳимоячиларнинг яхши ҳаракатлари жамоаларни голдан сақлаб турди.

Ўйин тақдирини ҳал қилган вазият 74-дақиқада юзага келди. Алибобо Раҳматлуллаев жарима майдони ичида дарвоза томон зарба берганида тўп Даврон Ҳошимовнинг қўлига тегди. Натижада бош ҳакам «Пахтакор» дарвозаси томон пенальти белгилади. Дилшод Жўраев уни аниқ амалга ошириб, жамоасини ҳисобда олдинга олиб чиқди.

Шундан сўнг тошкентликлар катта куч билан олдинга ўтишди. Бироқ ўйин якунига қадар ҳисобни тенглаштириш уларга насиб қилмади. «Андижон» шов-шувли ғалабага эришиб, мухлислари олқишига ҳақли равишда сазовор бўлди.

"АНДИЖОН" - "ПАХТАКОР" - 1:0 (0:0)
ГОЛ: Дилшод Жўраев (75-пенальти)
Огоҳлантиришлар: Иброҳим Отахонов (81) — Даврон Ҳошимов (82),
"Андижон": Турсунбоев, Азамат Исроилов (Азамат Бобожонов 68), Отахонов, Бекмуродов, Ильеску, Рўзимбой Аҳмедов (Алибобо Раҳматуллаев 54), Жўрабоев, Жўраев, Андрей Бугняк (Жавлон Гусейнов 83), Акбаров, Смоляченко
"Пахтакор": Лобанов, Станислав Андреев (Андрей Сидоров 79), Тожиев (с), Азим Аҳмедов, Ҳошимов, Соҳибов, Акбар Исматуллаев (Жамшид Болтабоев 89), Машарипов, Каримов, Искандеров, Жасур Ҳакимов (Владимир Козак 55)