Рио-де-Жанейро олимпиадасида кашфиётга айланган Шаҳрам Ғиёсов финал йўлланмасини қўлга киритди.

Ҳозиргина якунланган ярим финал жангида бухоролик боксчи амалдаги жаҳон чемпиони, марокашлик Муҳаммад Рабийни мағлубиятга учратди.

Жанг бошида ҳар иккала боксчи эҳтиёткорлик билан ҳаракат қилди. Вақт ўтган сари Рабийдан устунлигини ҳис қилган Ғиёсов рақибига очиқ жанг таклиф қилди ва тўла устунликни қўлга киритди. Марокашлик боксчи анча қийин аҳволга тушиб қолди. Ҳакамларнинг баҳолари беллашувнинг қандай ўтганини исботлаб турибди — 30:27, 30:27, 30:27. Шаҳрам ўз ғалабасини яна Криштиану Роналду услубида нишонлади.

Ҳамюртимизда финалда Сулаймон Сиссико (Франция) / Данияр Елеуссинов (Қозоғистон) жуфтлиги ғолибига қарши рингга кўтарилади. Олтин медал учун жанг 17 август куни бўлиб ўтади.