Фарғонада “Футболимиз келажаги” мусобақаcининг ҳудудий финал босқичи ўтказилди. Унда уч ёш гуруҳида 13 маҳалла футбол жамоаси ғолиблик учун баҳс олиб борди.

“Маҳалла” хайрия жамоат фонди вилоят бўлими ва бир қатор ташкилотлар ҳамкорлигида ўтказилган мусобақанинг ҳудудий финал босқичида 43 мингдан зиёд ўсмир қатнашган қуйи босқичлардан сараланган жамоалар иштирок этди.

Мусобақада 9-10 ёшлилар ўртасида Олтиариқ туманидаги “Тинчлик” шаҳарча фуқаролар йиғини ёшлари биринчи ўринни эгаллади. 11-12 ёшлилар ўртасида Тошлоқ туманидаги “Садда” маҳалла фуқаролар йиғини, 13-14 ёшлилар гуруҳида Фарғона шаҳрининг Ибн Сино номидаги маҳалла футбол жамоалари ғолиб бўлди.

– Ростини айтганда, ғалаба қозониш осон кечмади, – дейди Олтиариқ туманидаги “Тинчлик” шаҳарча фуқаролар йиғини жамоаси сардори Аслиддин Тўланбоев. – Бу баҳсларда ҳар жиҳатдан чиниқдик, мавжуд камчиликларни бартараф этиш устида мураббийлар кўмагида изландик. Уринишларимиз, саъй-ҳаракатларимиз бесамар кетмаганидан хурсандмиз.

Ғолиб ва совриндорлар ташкилотчилар томонидан тақдирланди.