Шаҳрам Ғиёсов Ўзбекистон делегацияси ҳисобига илк кумуш медални тақдим этди. 69 кг. вазн тоифаси финалида ҳакамлар ғалабани қозоғистонлик Данияр Елеуссинов тақдим этишди.

Қўшни юрт боксчиси иккинчи рақам остида ишлаб, қарши ҳужумда ўзининг узун қўллари билан зарбалар беришга ҳаракат қилди. Ғиёсов эса рақибни очиқ жангга чорлаб, кучли зарбалар беришга интилди. Биринчи ва иккинчи раундларда ҳакамлар устунликни Елеуссиновга беришди. Учинчи раундда эса устунлик тўлалигича Шаҳрам томонида бўлди. Ҳаттоки жанг сўнгида Даниярни мувозанатдан чиқаришга бир баҳя қолди. Қозоғистонлик спортчининг бахтига баҳс вақтига якунига етиб қолганди. Ҳакамларнинг баҳолари 0:3 — 28:29, 28:29, 28:29.

Ўз фаолиятида илк катта мусобақада иштирок этган Шаҳрам Ғиёсов финалгача бўлган йўлда 4 рақибни мағлуб этди. Бу йўлда у кучли ҳисобланган кубалик боксчини, жаҳон чемпиони бўлган марокашлик спортчини мусобақадан чиқариб юборди.

Бизга қувончли лаҳзаларни тақдим этган Шаҳрам Ғиёсовга миннатдорчилик билдирамиз.