Ўзбекистонлик учинчи боксчи Рио-де-Жанейро олимпиадасида чемпионликни қўлга киритди.

64 кг. вазн тоифасида Фазлиддин Ғоибназаров финалда келиб чиқиши кубалик бўлган Лоренсо Сотомайор (Озарбойжон)ни мағлубиятга учратди.

Ушбу жанг ўта ҳаяжонли ва эмоцияларга бой тарзда ўтди. Озарбойжонлик боксчининг қўллари узун бўлишига қарамасдан Фазлиддин жуда яхши ишлай бошлади. Назаримизда, ўзбек боксчиси биринчи раундда кўпроқ зарбалар берди. Фикримизга бир ҳакам қўшилди, аммо икки нафар ҳакам рақибга устунликни берди.

Иккинчи раундда Ғоибназаров ташаббусни оширди. Ҳаттоки боксчимизнинг кучли зарбасидан кейин рефери ҳисобни очиб, нокдаунни қайд этди. Шунга қарамасдан, иккинчи бўлим учун бир ҳакам Сотомайорнинг устунлигини эътироф этди.

Натижада учинчи бўлим олдидан 19:19, 19:19, 18:20 ҳисоби қайд этилаётганди. Ғалаба учун Фазлиддин сўнгги бўлимда тўлиқ устунликка эришиши талаб этиларди. Боз устига, озарбойжонлик спортчи чарчаб қолганди. Ғалаба бўлган иштиёқ Ғоибназаровни тонусда ушлаб турганди. Ўзбекистонлик боксчи сўнгги дақиқаларга қадар зарбалар беришда давом этди. Якуний бўлим учун ҳакамларнинг барчаси ўз устунликларини Ғоибназаровга беришди — 2:1 (29:28, 29:28, 28:29).

Тўртинчи олтин медаль муборак, Ўзбекистон!