Ўзбекистон бокс терма жамоаси Рио—2016 Олимпиадасида 7 та медални қўлга киритгани, Ўзбекистон бокс федерациясини ёзги Олимпиада ўйинлари тарихида мамлакат делегацияси учун энг кўп медаль тақдим этган федерацияга айлантирди.

Рио—2016 Олимпиадаси старти олдидан Ўзбекистон бокс федерацияси ва Ўзбекистон спорт курашлари ассоциацияси мамлакат делегацияси учун Олимпиада ўйинлари тарихида бир хилда — 7 тадан медаль келтирганди.

Ўзбекистон бокс федерацияси медаллар сони бўйича аввалги 5 та Олимпиадада қайд этган натижасини биргина Рио—2016 да такрорлай олди.

Олтин медаллар сони бўйича бокс федерацияси Рио Олимпиадасидан кейин спорт курашлари ассоциацияси билан тенглашиб олди — 4 тадан олтин. Спорт курашларида Артур Таймазов (2004, 2008, 2012) ва Александр Доктуришвили (2004) олтин медалга эга чиққан бўлса, боксчилардан бу муваффақият Муҳаммадқодир Абдуллаев (2000), Ҳасанбой Дўстматов (2016), Шаҳобиддин Зоиров (2016) ҳамда Фазлиддин Ғоибназаровга (2016) насиб қилди.

Олимпиада—2016 дан кейин Ўзбекистон бокс федерациясининг олимпия ўйинлари тарихидаги медаллари сони умумий 14 тага етди (4 та олтин, 2 та кумуш ва 8 та бронза). Ўзбекистон спорт курашлари ассоциациясида эса бу кўрсаткич 10 тани ташкил қилади (4 та олтин, 3 та кумуш ва 3 та бронза).

Ўзбекистон делегациясига медаллар тақдим этиш бўйича кейинги ўринларни Ўзбекистон дзюдо федерацияси (6 та: 2 та кумуш ва 4 та бронза), Ўзбекистон гимнастика федерацияси (2 та бронза), Ўзбекистон оғир атлетика федерацияси (1 та олтин) эгаллаб турибди.