Наманганда белбоғли кураш бўйича катталар ўртасида Ўзбекистон чемпионати бўлиб ўтди.

Ўзбекистон Республикаси Маданият ва спорт ишлари вазирлиги, “Миллий тикланиш” демократик партияси марказий кенгаши, Болалар спортини ривожлантириш жамғармаси ҳамда Наманган вилояти ҳокимлиги ҳамкорлигида ташкил этилган мусобақада Наманган, Хоразм, Самарқанд, Сирдарё, Жиззах, Тошкент, Фарғона, Андижон вилоятлари ва Тошкент шаҳридан 300 га яқин спортчи иштирок этди.

Беллашувларда полвонлар 48 килограммдан 100 килограммгача бўлган 23 вазн тоифасида ғолиблик учун гиламга тушди.

Мусобақа якунига кўра, белбоғли кураш йўналишида Наманган вилоятидан Бобур Маҳкамов, Абдурасул Ҳабибуллаев, Отабек Сойиббоев, Андижон вилоятидан Ҳусниддин Рўзиев, Тошкент шаҳридан Муслим Аҳмаджонов, Фарғона вилоятидан Зайнобиддин Ортиқов, Бобур Тўхтасинов ўз вазн тоифасида барча рақибларидан устун келди.

Белбоғли курашнинг эркин йўналишида эркаклар ўртасида Наманган вилоятидан Ғиёсжон Мамасиддиқов, Искандар Исмоилов, Муроджон Аббосов, Тошкент вилоятидан Санжар Қўчқоров, Ғолибжон Аҳмедов, Хоразм вилоятидан Раҳматжон Шомуродов, Андижон вилоятидан Жасурбек Исроилов ва Фарғона вилоятидан Обидали Мавлонов чемпионлик шоҳсупасига кўтарилди.

Қизлар ўртасидаги беллашувларда наманганлик Дилшода Тўрабоева, андижонлик Шаҳзода Эргашева, Мафтуна Аҳмедова, Анифе Куртсеидова, самарқандлик Гулмира Исматова, Тошкент шаҳридан Нафиса Аҳмаджонова, Фарғона вилоятидан Гулҳаёт Маматқулова олтин медалга сазовор бўлди.

Ғолиблар шу йилнинг октябрь ойида Россияда бўлиб ўтадиган белбоғли кураш бўйича жаҳон чемпионатида иштирок этади.