Рио-2016 олимпиядасида олтин медал билан ғалаба қозонган спортчилармиз Ўзбекистон оммавий ахборот воситаларида кенг ёритилди ва ёритилмоқда ҳам. Ўзбекистонлик жамоат арбоби, президент Ислом Каримовнинг кенжа қизи Лола Каримова эса, журналистлар назаридан бироз четда қолган спортчимизни алоҳида эътироф этди. Лола Каримова ижтимоий тармоқдаги ўз саҳифасида қуйидагиларни ёзиб қолдирган:
«Азизлар, ўзбекистонлик гимнастикачимиз Оксана Чусовитина Рио-де-Жанейрода бўлиб ўтаётган Олимпиададаги финал баҳсларида еттинчи ўринни эгаллаб, таяниб сакраш бўйича энг кучли спортчилар ўнталигига кирди.
Спорт гимнастикаси бўйича жаҳон ва Олимпиада чемпиони унвонларига сазовор бўлган Оксана, мана 25 йилдан ошибдики, умрини катта спортга бағишлаб келмоқда.
Чусовитина – чинакам буюк спортчи! 41 ёшни қарши олган Оксана — еттинчи бора Олимпиада ўйинларида қатнашган илк гимнастикачи аёлдир.
Катта спортда эришган улкан муваффақиятлари билан Оксанани чин кўнгилдан қутлаймиз!
Дунё бўйлаб минглаб спортчилар ва оддий инсонларни илҳомлантирувчи Оксана Чусовитина Рио-де-Жанейродаги Олимпиада ўйинларида иштироки билан ёш билан боғлиқ стереотипларни йўққа чиқарди ва инсон иродаси қанчалар кучли эканини исботлади!
Табриклаймиз сизни, Оксана!»
Ҳақиқатан ҳам, Оксана Чусовитина эътирофга лойиқ.
