Ватанни шарафлаш — муқаддас бурч
Иқтидорли дзюдочимиз Диёрбек Ўрозбоев Ўзбекистон спорт делегацияси ҳисобига дастлабки медални келтирди. Вазни 60 килограммгача бўлган спортчилар баҳсида Австралия, Швейцария, Бразилия ҳамда Грузия терма жамоаси аъзоларини мағлуб этиб, шоҳсупанинг учинчи поғонасидан жой олди.

— Биз ҳеч кимдан кам эмасмиз, ҳеч кимдан кам бўлмаймиз! Бу сўзлар ўз кучимга ишонч, юрагимга далда бағишлади,  — дейди Диёрбек Ўрозбоев. — Хурсандчилигимизнинг чегараси йўқ. Бундай ғалабаларга, аввало, давлатимиз раҳбарининг мамлакатимизда спорт ривожига қаратаётган алоҳида эътибори, кўрсатаётган ғамхўрлиги асосий омил бўлмоқда. Яратиб берилаётган шароитлар, билдирилаётган юксак ишонч бизни янги-янги зафарлар сари чорламоқда. Баҳсга биринчилардан бўлиб киришиш ҳам шарафли, ҳам масъулиятли. Мен бунга ҳар жиҳатдан тайёр эдим.  Энг асосийси, халқимиз ва Президентимиз ишончини оқлаганимдан хурсандман. Бу — барчамизнинг ютуғимиз. Олимпия ўйинларидаги илк ютуғимни Ватанимиз мустақиллигининг 25 йиллигига бағишлайман.

Тўмарис Аъзам,
“Milliy tiklanish” мухбири