Бердимуҳаммедовнинг сўзларига кўра, айни пайтда мамлакатнинг барча ҳудудларида замонавий спорт марказлари, стадионлар, физкультура-соғломлаштириш мажмуалари фаолият юритмоқда, хориждан мураббийлар таклиф этилмоқда, давлат спортни мунтазам қўллаб-қувватламоқда, бироқ туркман спортчиларининг натижалари ҳалигача мақтанарли эмас. Бу ҳақда Спутник хабар бермоқда.
"Туркманистон раҳбари шундай имкониятлар яратилганига қарамай ватан спорти обрўсини, юрт байроғини баланд кўтариш ишончини оқлай олишмаганидан норозилигини билдирди", — дейилади маҳаллий ОАВ.
Спорт қўмитаси раҳбари Какабай Сейдов қисқа муддат ичида йўл қўйилган камчиликларни тўғриламайдиган бўлса, лавозимидан бўшатилиши тўғрисида жиддий ҳайфсан олди.
Туркманистон Олимпия ўйинларида 1996 йилдан буён иштирок этади, лекин туркман спортчилари шу кунга қадар бирор марта ҳам Олимпия медали олишмаган. Спортнинг бешта турида тўққиз нафар спортчи билан қатнашган терма жамоа Рио Олимпиадасида ҳам медалсиз қолди.
