Дарҳақиқат, дзюдо — мамлакатимизда жадал ривожланаётган спорт тури саналади. Юртимиз дзюдочилари Олимпия ва Осиё ўйинлари, жаҳон ва қитъа чемпионатлари, турли нуфузли турнирларда мунтазам совринли ўринларга сазовор бўлмоқда, янги-янги истеъдод эгалари кашф этиляпти.
— Ота-она учун фарзанд камолини кўришдан ҳам ортиқроқ бахт бўлмаса керак, — дейди Диёрбек Ўрозбоевнинг отаси Бахтиёр Шарипов. — Бугун ҳар қанча ғурурлансам, фахрлансам арзийди. Ўғлим Ватанимиз шарафини муносиб ҳимоя қилиб юртимизга ёруғ юз билан қайтиб келди. Ишончим комилки, улкан эътибор ва ғамхўрликни дилдан ҳис қилган фарзандларимиз ҳали кўплаб Олимпия ўйинларида такрор ва такрор Ўзбекистон шарафини юксакларга кўтарадилар.
Дарҳақиқат, эркин ва обод, тинч ва осойишта юртда вояга етаётган, кўзлари ёниб турган, ўз кучига ишонган ўғил-қизларимиз маррани баланд олар экан ўз ҳаётини Ватани равнақи, эл-юртининг обрўсига дахлдор, деб билади. Бу йўлда билим ва салоҳиятини, истеъдоду иқтидорини аямайди. Бундай авлодни ҳеч ким енга олмайди, унинг қадди ҳам, қадри ҳам доимо баланд бўлади.
Тўмарис Аъзам,
“Milliy tiklanish” мухбири
