Рио–2016 Олимпиадасида Ўзбекистон бокс терма жамоасининг муваффақиятига катта ҳисса қўшган мураббий Рўзиохунов Раҳматжон Турсунович «Ўзбекистон Республикасида хизмат кўрсатган спорт устози» фахрий унвони билан мукофотланади. Бу «Ўзбекистон Мустақиллигининг йигирма беш йиллиги муносабати билан фан, таълим, соғлиқни сақлаш, адабиёт, маданият, санъат, маънавият ва маърифат, оммавий ахборот воситалари ҳамда ижтимоий соҳалар ходимларидан бир гуруҳини мукофотлаш тўғрисида»ги Ўзбекистон Республикаси Президентининг фармонида акс этди. Ҳужжат матнини ЎзА эълон қилди.
Раҳматжон Рўзиохунов билан бир қаторда бокс бўйича Ўзбекистон миллий терма жамоаси мураббийлари Аҳмедов Маъруфжон Қодирович, Тойгонбаев Зиятдинбек Курманбекович, карате бўйича Ўзбекистон миллий терма жамоаси мураббийи Арслонов Шуҳрат Арслон ўғли, бадиий гимнастика бўйича Ўзбекистон миллий терма жамоаси мураббийи Израилбекова Зарина Батировна, Ўзбекистон мини-футбол ассоциацияси раиси ўринбосари Усмонов Жаҳонгир Мираброрович, эркин кураш бўйича Ўзбекистон миллий терма жамоаси мураббийи Ҳидоятов Эшпўлат Эркинович, Тошкент вилояти Чирчиқ шаҳридаги болалар ва ўсмирлар спорт мактаби директори Якубов Абдурауф Сатторович «Ўзбекистон Республикасида хизмат кўрсатган спорт устози» унвони билан мукофотланди.
