Жаҳоннинг йирик стадионларида қойилмақом ўйин кўрсатиб, миллионлаб мухлислар орттирган ва тўп суриб, энг бой шахсларидан бирига айланган португалиялик футбол юлдузи ҳали ёш бўлишига қарамай, жуда юқори марраларга эришди ва ўзининг эзгу амаллари билан кўпчиликка ибрат бўлмоқда.
Унинг ҳайкали туғилиб ўсган жойи – Мадейрага ўрнатилди, фаолиятига бағишланган ажойиб музей ҳам очилди. У Португалиянинг ифтихори, “Реал Мадрид”нинг юзи, Планетамиздаги миллионлаб футбол ишқибозларининг севимли кумири!
Энг муҳими, у “10 та бармоғини оғзига тиққан”лардан эмас. Хайрия қилишни ҳам хуш кўради. Ва буни пиар учун қилмайди! Айрим маълумотларга кўра, Португалия терма жамоасида иштирок этган футболчи Европа Чемпионатида жамоанинг ғалабаси ортидан унга ажратилган бонус -275 000 еврони ўсма касаллиги билан азият чекаётган болажонларнинг даволанишини молиялаштириш учун хайрия қилди!
Эзгуликка тез фурсатда “жавоб” ҳам қайтди. “Реал”нинг Чемпионлар Лигасидаги ғалабаси туфайли Роналду ҳисобига махфий равишда яна бонус келиб тушди. Унинг миқдори 465 000 еврони ташкил этади.
Криштиану шунча ишлаб топганига яраша, ўз орзусидаги каби яшашни ҳам унутиб қўяётгани йўқ. Евро-2016 ниҳоясига етгач, португалиялик бой футболчи ўзи учун янги суперкар харид қилди. Bugatti Veyron! Нархи – 1,7 миллион евро! Бироқ, куз ойида Bugatti Veyron ўрнини Volkswagen концернининг янги суперкари – Bugatti Chiron эгаллайди. Олтин фаслда Роналду балки бу автомашина билан ҳам бир қизиқиб кўрса, ажабмас!
Ана шунақа гаплар!
Жасур ҲАМРОЕВ
