Айни кунларда Осиёнинг тўрт мамлакатида 2017 йили Хитойда бўлиб ўтадиган U-16 ўсмир қизлар ўртасидаги Осиё чемпионатига йўлланма берувчи саралаш ўйинлари бўлиб ўтмоқда.
Эътиборлиси, мазкур саралаш баҳсларини бошқариш учун ўзбекистонлик ФИФА рефериси Анна Сидорова ҳамда ФИФА лайнсмени Зилола Раҳматова Осиё Футбол Конфедерациясидан таклиф олган. Анна Сидорова ҳамда унинг ёрдамчиси айни кунларда Таиланд мамлакатида бўлиб ўтаётган Осиё Чемпионати саралаши "A" гуруҳи ўйинларида учрашувларни бошқармоқдалар. Жумладан, мазкур гуруҳнинг 1-туридан ўрин олган Мьянма ҳамда Лаос ўсмир қизлари ўртасидаги учрашувни айнан Анна Сидорова бошчилигидаги ҳакамлар бригадаси бошқариб борган.
Таъкидлаш жоиз, Бангладеш мамлакати мезбонлик қилаётган U-16 ўсмир қизлар ўртасидаги Осиё чемпионати саралаш баҳслари "C" гуруҳида ҳам ўзбекистонлик ҳакамлар ишлайдилар. Мазкур гуруҳ ўйинларини бошқариб бориш учун ўзбекистонлик ФИФА рефериси Эдита Миробидова ҳамда ФИФА лайнсмени Кристина Середа ОФКдан таклиф олганлар. Ўзбекистонлик ҳакамлар мазкур гуруҳнинг 1-туридан ўрин олган БАА ҳамда Сингапур ўсмир қизлари ўртасидаги учрашувни бошқаришган.
