Сузиш бўйича АҚШ терма жамоасининг аъзоси, 4×200 метрга комплекс усулда эстафета сузишда Рио–2016 Олимпиадасининг чемпиони Райан Лохте 10 ойга барча мусобақалардан четлатилди. Лохтенинг дисквалификацияси ҳақидаги қарор Халқаро олимпия қўмитаси, АҚШ олимпия қўмитаси ва АҚШ сузиш федерацияси томонидан қабул қилинди. Бу ҳақда AFP’га таяниб, «РБК» хабар бермоқда.
Райан Лохте Рио–2016 Олимпиадаси давомида АҚШ термасидаги жамоадошлари – Жимми Фейген, Жек Конгер ва Гуннар Бентц билан номаълум кимсалар томонидан тунаб кетилгани ҳақида маълум қилганди.
Суриштирув натижасида ҳеч қандай ўғрилик содир бўлмагани, аксинча, Лохте ва унинг жамоадошлари ёқилғи қуйиш шохобчасидаги ҳожатхона эшигини бузгани аниқланди. Шохобча қўриқчиси спортчилардан етказилган зарарни қоплашни сўраган. Якунда Лохте ёлғон гапирганини тан олди ва бунинг учунузр сўраган эди.
Август ойи якунида сузиш спорти кийимларини ишлаб чиқарувчи Speedo ҳамда Ralph Lauren компанияси Лохте билан ҳомийлик шартномаларини бекор қилди.
Райан Лохте Афина–2004 Олимпиадасида 1 олтин медални олган, Пекин–2008 ва Лондон–2012 Олимпия ўйинларида икки мартадан чемпион бўлган. Шунингдек, 32 ёшли спортчи жаҳон чемпионатларида 18 та олтин медални қўлга киритган.
