«Реал»нинг собиқ ҳужумчиси Раулнинг «Барселона» клуби Нью-Йоркда ташкил қилган тадбирида иштирок этган "Қироллик клуби" мухлисларига ёқмади. Ишқибозлар Раулнинг бу ишидан ҳайронлигини яшириб ўтиришмади. Бу ҳақда Испания телеканалларининг бирида эфирга узатилган "El Chiringuito de Jugones" дастурида журналистлар хабар беришган.
Телевидениеда ОАВ вакиллари иштирокида баҳс-мунозара ўтказилиб, унда Раулнинг қарори қанчалик тўғри бўлгани муҳокама қилинди. "Кўк-анорранглилар"нинг тадбирида клубнинг собиқ юлдузлари Роналдиньо ва Христо Стоичков ҳам иштирок этишди. «Реал» мухлисларининг фикрича, Рауль ушбу маросимда иштирок этмаслиги ва Стоичков билан бирга суратга тушмаслиги керак эди. Христо имконият туғилиши билан «Реал» шаънига "илиқ" фиклар билдириши билан машҳур.
«Барселона» шу кунларда Нью-Йоркда офис очди. Жамоа бу орқали АҚШ бозорини эгаллашни кўзлаган. Шунингдек, худди шундай офис Бразилиянинг Сан-Паулу шаҳрида ҳам очилиши кутилмоқда.
Эслатиб ўтамиз, Рауль Испаниянинг АҚШдаги элчиси ҳисобланади.