Бразилия терма жамоаси бош мураббийи Карло Анчелотти «Реал»нинг бир нечта собиқ футболчиларини санаб ўтди ва уларда мураббийлик фаолиятини бошлаш учун яхши имконият борлигини таъкидлади.
«Кроос, Каземиро ва Модрич мураббий бўлиш учун зарур бўлган барча билимларга эга. Мен ўз қарорларимни улар билан муҳокама қилиб турардим», — дея Анчелоттининг сўзларини келтирмоқда Cadena SER.
Тони Кроос аллақачон фаолиятини якунлаган. Германиялик футболчи 2024 йилги Европа чемпионатидан сўнг «бутсиларини михга илди». Каземиро ва Лука Модрич эса ҳали ҳам ўз фаолиятларини давом эттиришмоқда — улар мос равишда «Манчестер Юнайтед» ва «Милан» клублари шарафини ҳимоя қилишмоқда.
Карло Анчелотти ўтган йили «Реал»ни тарк этган эди. Шундан сўнг италиялик мутахассис Бразилия терма жамоасини бошқара бошлади.
