Тошкентда ўтаётган Ўзбекистон ва Швейцария терма жамоалари ўртасидаги теннис бўйича Девис кубогининг жаҳон лигасига ўтиш босқичи доирасида жуфтликлар баҳси ўтказилди.

Денис Истомин ва Фаррух Дўстовдан иборат жуфтлик Адриен Боссел/Хенри Лааксонен жуфтлигига қарши кортга чиқди. Дастлабки геймда тўпни меҳмонлар ўйинга киритишди ва ҳамюртларимиз брейк-поинтга эга бўлишди, аммо ўзбекистонликлар бу имкониятдан фойдалана олишмади. Сет давомида швейцарияликлар бир марта брейк очкони қўлга киритишди. Бу уларга сетда ғалаба қозониш учун етарли бўлди.

Иккинчи сетни ватандошларимиз янада бўш ўтказишди ва европаликлар бу бўлимда 6:2 ҳисобида устун келишди.

Учинчи сетда Истомин ва Дўстов баҳсни қутқариб қолишга ҳаракат қилишди. Бўлим тай-бреккача давом этди. Афсуски, "лотерея"да омад Швейцария терма жамоаси фойдасига ҳал бўлди — 7:2. Якуний ҳисоб — 4:6, 2:6, 6:7.

Шу тариқа, иккинчи кундан кейин Швейцария 2:1 ҳисобида олдинга чиқиб олди. Эртага яккалик тартибда Денис Истомин - Хенри Лааксонен ва Санжар Файзиев - Антоине Белье ўйинлари бўлиб ўтади.

Девис кубоги. Жаҳон лигасига ўтиш босқичи
Денис Истомин / Фаррух Дўстов (Ўзбекистон) - Адриен Боссел/Хенри Лааксонен (Швейцария) - 0:3 (4:6, 2:6, 6:7)