«Манчестер Юнайтед» бош мураббийи Жозе Моуринью Англияда чемпионлик унвонини сақлаб қолиш қийин экани борасида фикр билдирди.

«Совринни сақлаб қолиш жуда ҳам қийин, деб ўйлайман — нафақат «Лестер»га, балки бошқа клубларга ҳам. Тарихан шундай», — деди Моуринью.

«Премьер-лига тарихида бунинг уддасидан чиқа олган жамоалар кўп эмас. Улардан бири, албатта, «МЮ» бўлган. Яна бири эса, тарихдаги энг ёмон мураббий устозлик қилган жамоа», — деди мураббий. 

«Бу ҳақиқатан ҳам қийин вазифа. «Лестер»га қараб туриб, бир нарсани тушунаман: бу яхши жамоа, бироқ улар ўтган мавсум катта жамоалар яхши бўлмагани учунгина премьер-лигада ғолиб чиқди», — деди «МЮ» устози.

«Биринчи кунданоқ айтгандим — чемпионлик мақсадим ҳаётим мазмуни. Тўғриси, бу клубда бундан бошқа баёнотни қандай қилиб айтиш мумкинлигини мен тушунмайман, ваҳоланки, бундай баёнот бериш таваккалчилик эканини билардим», — деди Моуринью. 

Эслатиб ўтамиз, АПЛ тарихида, «МЮ» ташқари, фақат Моуринью қўл остидаги «Челси» ўз чемпионлик унвонини сақлаб қола олган (2004/05, 2005/06 йилги мавсумларда).