«Реал» ярим ҳимоячиси Федерико Вальверде жамоадоши Орельен Тчуамени билан содир бўлган ва ўзининг шифохонага тушиши билан якунланган низо ҳақида илк бор фикр билдирди.

Аввалроқ ОАВда Мадрид клуби машғулотида футболчилар ўртасида муштлашув содир бўлгани ҳақида хабарлар тарқалган эди. Матбуот маълумотларига кўра, Тчуамени Вальвердега зарба берган, натижада у йиқилиб, боши билан урилган.

Кейинчалик «Реал» уругвайлик футболчи бош мия жароҳати олгани ва тахминан икки ҳафтани, жумладан, Ла Лига 35-туридан ўрин олган «Барселона»га қарши ўйинни ўтказиб юборишини маълум қилди. Бундан ташқари, клуб ҳар икки футболчига нисбатан интизомий иш очилганини эълон қилган эди.

Вальверде вазият бўрттириб юборилганини ва француз билан ўртасида ҳеч қандай муштлашув бўлмаганини таъкидлади. Унинг қайд этишича, баҳслашиш вақтида тасодифан столга урилиб кетган ва шу сабабли пешонаси ёрилиб, шифохонага мурожаат қилишга мажбур бўлган.

— Жамоадошим мени ургани йўқ, мен ҳам уни урганим йўқ. Гарчи сизларга бизни ёқалашиб кетган ёки бу қасддан қилинган деб ишониш осонроқ эканини тушунсам-да, аслида бундай бўлмади.

Баҳслашиб қолганимизда тасодифан столга урилиб кетдим, бу эса пешонамда кичик жароҳат ҳосил қилди ва шифохонага одатий ташрифни талаб этди, — дейилади Вальверденинг ижтимоий тармоқларда эълон қилган баёнотида.

Ярим ҳимоячи «Реал»нинг муваффақиятсиз мавсуми ва жамоанинг Чемпионлар Лигасидан чиқиб кетганини оғир қабул қилаётганини тан олди.

— Биз яна бир йилни беҳуда сарфладик. Ичимдаги ғазаб ва аламни жиловлаб юргандим, якунда эса ҳаммаси маъносиз жанжалга айланиб кетди, — деди футболчи.

Шунингдек, Вальверде содир бўлган воқеа учун узр сўради ва аввалгидек клубга содиқ эканини таъкидлади.

— «Реал» — ҳаётимдаги энг муҳим қадриятлардан бири ва мен бунга бефарқ бўла олмайман, — дея қўшимча қилди уругвайлик.