Мадриднинг “Реал” клуби ҳужумчиси Килиан Мбаппе жамоа ичидаги навбатдаги можаро фонида диққат марказига тушди.
Испаниянинг Sport нашри ёзишича, Вальдебебасдаги машғулотдан сўнг, яъни аввалроқ Орельен Чуамени ва Федерико Вальверде ўртасида жанжал чиққанидан кейин, Мбаппе клуб базасини яхши кайфиятда тарк этган. Камералар француз футболчисининг машғулот маркази ҳудудидан чиқиб кетаётганда машина ичида кулаётганини тасвирга олган.
Таъкидланишича, бу ҳолат “қаймоқранглилар” ичидаги таранг муҳит фонида кенг муҳокамаларга сабаб бўлган. Аввалроқ Чуамени ва Вальверде ўртасидаги яна бир тўқнашувдан кейин клуб раҳбарияти жамоанинг шошилинч йиғилишини ташкил қилгани хабар қилинган эди.
Манбага кўра, Мбаппе жамоавий учрашувдан кейин базани биринчи бўлиб тарк этган футболчилардан бири бўлган. Шунингдек, француз футболчиси тиббий кўрикдан ўтгани ва “Барселона”га қарши ўйинда майдонга қайтишга яқин экани айтилмоқда.
Испания ОАВлари Мбаппе Чуамени билан Франция терма жамоасидаги давридан буён яхши муносабатда эканини ҳам қайд этмоқда. Аввалроқ матбуотда ҳар икки футболчи Дидье Дешамнинг мадридликлар бош мураббийи этиб тайинланиши эҳтимолига ижобий қараётгани ҳақида хабарлар тарқалган эди.
Бундан ташқари, сўнгги кунларда Мбаппе жамоа учун муҳим паллада Италияга сафар қилгани сабабли мухлислар ва ОАВ танқидига учрагани ҳам таъкидланмоқда.













