Англия Премьер-лигасида кетма-кет иккита мағлубиятдан кейин «Манчестер Юнайтед» йирик ҳисобда ғалаба қозонишга муваффақ бўлди.

"Лестер"га қарши ўйиннинг дастлабки 20 дақиқасида мезбонларнинг ўйини қовушмади. Кейин манкунианликларга бурчак тўплари катта ёрдам берди. Майдон эгалари танаффусга қадар "тулкилар" дарвозасини нақ 4 марта ишғол қилишди. Шулардан 3тасида бурчак тўпидан сўнг рақиб дарвозасидан ўрин олди. "Стандарт"ларни Смоллинг, Рэшфорд ва Погба голга айлантиришди. Яна бир гол эса чиройли комбинация натижаси бўлди. Мата-Погба-Лингард узатмаларидан кейин Хуан зарбавор вазиятга чиқди ва 14 метрдан аниқ зарба билан дарвозани ишғол қилди.

Ўйин тақдири ҳал бўлганидан кейин Раньери жамоа етакчилари Риёд Маҳрез ва Жейми Вардига дам беришга қарор қилди. Захирадан тушган футболчилар лестерликлар ўйинини кучайтира олишди. Жумладан, Демарай Грэй 59-дақиқада олис масофадан аниқ зарба билан Давид де Хеа қўриқлаётган дарвозанинг юқори бурчагига тўпни "михлади"! Грэйнинг яна бир шундай зарбасини Де Хеа қайтаришга муваффақ бўлди. Меҳмонларнинг яна бир ҳужум пайтида Энди Кинг жарима майдончаси ичида зарба бериш имкониятга эга бўлди. Бу сафар ҳам посбон зарбани қайтарди.

Шу тариқа, "МЮ" амалдаги чемпион устидан йирик ҳисобда ғалаба қозонди ва ўз очколарини 12тага етказиб юлди.

Манчестер Юнайтед – Лестер 4:1 (4:0, 0:1)
Голлар: 1:0 – 22 Смоллинг, 2:0 – 37 Мата, 3:0 – 40 Рэшфорд, 4:0 – 42 Погба, 4:1 – 59 Грэй.
Манчестер Юнайтед – Де Хеа, Валенсия, Смоллинг, Байи, Блинд, Лингард (Кэррик, 78), Погба, Эррера, Мата (Янг, 87), Рэшфорд (Руни, 83), Ибрагимович.
Лестер – Цилер, Морган, Фукс, Симпсон, Хут, Дринкуотер, Амарти, Олбрайтон (Шлупп, 62), Марез (Кинг, 46), Варди (Грэй, 46), Слимани.
Огоҳлантиришлар: Хут (50), Симпсон (74)