Ёшлар лигаси 24-тур учрашувларини “Бухоро” – “Бунёдкор” баҳси очиб берди.

2:2 ҳисобидаги дуранг натижа билан якунланган учрашув икки хил таассурот қолдирди. Биринчи бўлимда катта ташаббусга эга бўлган ёш “қалдирғочлар” танаффусгача рақиб дарвозасига иккита тўп киритишди. Аввалига Нуриддин Ҳасанов кучли зарбаси билан чиройли гол муаллифига айланган бўлса, Миржаҳон Мираҳмадов шерикларининг аниқ тўп узатишини гол билан якунлади.
Иккинчи 45 дақиқаликда бунёдкорчиларнинг хотиржамликка берилишидан мезбонлар фойдаланиб қолишди. Бухороликлар кўпчилик билан ҳужумга ўтишди ва Мирфайз Муҳиддинов ана шундай ҳужумларнинг иккитасидан унумли фойдаланиб, якуний натижа 2:2 бўлишини таъминлади.

“Бунёдкор” ёшларининг икки очко йўқотишидан асосий таъқибчимиз – “Пахтакор” фойдалана олмади. “Шерлар” ҳам ушбу тур доирасида дуранг билан кифояланишди. Шу тариқа, “Бунёдкор” ва “Пахтакор” ёшлари ўртасидаги очколар фарқи 11талигича қолди.