Бугун Ёшлар лигаси 24-тур учрашувлари доирасида “Локомотив” ўринбосарлари “Пахтакор” ёшлар таркибига қарши баҳс юритди. Қибрайда кечган ўйин қизиқарли кўриниш олди ва кескин қарама-қаршиликларга бой тарзда ўтди.
Ўйин аввалида ҳар икки жамоа вакиллари ҳам устунликни ўз томонларга оғдиришга уринишди. Биринчи бўлим тенгкурашлар остида ўтди, дейиш мумкин. Лекин ҳар қанча уринишмасин томонларга биринчи бўлимда гол киритиш насиб этмади.

Иккинчи бўлим бошида “Пахтакор” футболчилари бир нечта қулай имкониятга эга бўлишди. Лекин Мамур Икромовнинг ишончли ҳаракатлари рақибга гол уриш имконини бермади. “Локо” футболчилари эса тезкор қарши ҳужумлар ташкил этишга уринишди. Шундай ҳужумлардан бирида тўп кутилмаганда Аббос Отахоновнинг оёғига тегиб, “Пахтакор” дарвозасидан ўрин олди. Лекин ушбу голдан 3 дақиқа ўтгач захирадан ўйинга қўшилган Беҳруз Саъдиллаев жамоадошлари узатиб берган тўпни Мамур Икромов дарвозасига жойлаб қўйди. Рақиб дарвозасини ишғол этиш бошқа ҳеч кимга насиб этмади ва учрашув 1:1 ҳисобидаги дуранг билан тугади.

Ёшлар лигаси
“Пахтакор” (Тошкент)– “Локомотив” (Тошкент) 1:1
Голлар: Саъдиллаев Беҳруз (70) - Отахонов Аббос (авг. 67)