"Бухоро” – “Бунёдкор” учрашувидан кейинги матбуот анжуманининг иккинчи қисмида бухороликлар устози Жамшид Саидов қатнашди.

- Юқори темпдаги учрашув гувоҳига айландик. Афсуски, мана шундай қизиқарли учрашувда ҳеч бир футболчи гол ура олмади. Ўйлашимча, бугунги баҳс мухлисларга манзур бўлди. Йигитларга ва бизни бутун ўйин давомида қўллаб-қувватлаб турган мухлисларга алоҳида раҳмат айтаман. Фикримча, биз ҳам, “Бунёдкор” ҳам икки очко йўқотди. Биз уйда ўйнаганимиз учун, “Бунёдкор” эса чемпионлик учун курашаётгани учун шундай деяпман. Навбатдаги учрашувни Наманганда “Навбаҳор”га қарши ўтказамиз. Бундан буён енгил учрашувлар қолмади, деб ўйлайман. Ҳозир аутсайдер клублар ҳам етакчиларга муносиб қаршилик кўрсатишяпти. Шунинг учун олдиндан бир нарса деб бўлмайди. Олдинда икки ҳафталик танаффус бор. Жароҳатланган футболчиларимиз шу орқада сафга қайтишга умид қиламан, - дейди Жамшид Саидов.