Ўзбекистон Миллий олимпия қўмитасида спорт курашлари ассоциацияси, шунингдек бокс ва оғир атлетика федерациялари мутасаддилари тўрт йиллик давр мобайнида қилинган ишлар юзасидан ҳисобот топширишди. Тадбирни Ўзбекистон Республикаси Маданият ва спорт ишлари вазирининг биринчи ўринбосари Мурод Алиев очиб берди.
Маълумки 2012-йилги Лондон Олимпиадасидан сўнг юртимизда навбатдаги Олимпия ўйинларига муносиб тайёргарлик кўриш йўлида улкан ҳамжда иш олиб борилди. Энг аввало 2013-йилнинг 25-февралида Ўзбекистон Республикасининг Биринчи Президенти Ислом Каримов томонидан имзоланган “Ўзбекистон спортчиларини 2016-йил Рио-де-Жанейро шаҳри (Бразилия)да ўтказиладиган XXXI ёзги Олимпия ва XV Паралимпия ўйинларига тайёргарлиги тўғрисида”ги қарори бўлажак мувафақиятларга замин яратди ҳамда спортчи ва мураббийлар учун даcтурил амал бўлиб хизмат қилди.
Рио-де-Жанейрода ўзбекистонлик спортчилар ҳар қачонгиданда муваффақиятли иштирок этиб, ҳар жабҳада натижаларни яхшилашга эришишди. Биринчи маротаба Олимпия ўйинларида 13 та медаль қўлга киритилди. Биринчи мартотаба сайёрамизнинг энг йирик спорт фестивалида тўрт маротаба мадҳиямиз янграб, байроғимиз сарбаланд кўтарилди. Биринчи марта ўзбек ўғлони Олимпия ўйинлари рекордини янгилашга муваффақ бўлди. Табиийки бу ютуқлар ўз ўзидан қўлга киритилгани йўқ. Бу давлатимиз ва ҳукуматимиз раҳбарларининг ғамҳўрлиги ва эътибори, шунингдек тўрт йил давомида бутун спорт жамоатчилиги томонидан олиб борилган улкан ҳажмдаги ишлар самараси бўлди десак муболаға бўлмайди.
Албатта Миллий олимпия қўмитасида қилинган ўзгаришлар, қўмита бошқарувига янги раҳбарларнинг тайинланиши ва ишни тўғри, профессионал тарзда йўлга қўйилиши ҳам муваффақиятга асосий омиллардан бири бўлиб хизмат қилди. Тадбирда биринчи бўлиб спорт курашлари ассоциацияси бош котиби Шуҳрат Мамадалиевнинг ҳисоботи тингланди. Маълумки XXXI ёзги Олимпия ўйинларида эркин курашда Ихтиёр Наврўзов ва Магомед Ибрагимов, юнон-рум курашида эса Элмурот Тасмуродовлар бронза медалларига сазовор бўлишди. Мамадалиев тўрт йиллик циклда олиб борилган ишлар, ташкил этилган ўқув машғулот йиғинлари, спортчиларнинг халқаро турнирлардаги иштироки юзасидан маълумот берди.
Шак шубҳасиз Риода ўзбекистонлик боксчилар бутун дунёни ҳайратга солишди. Ўнта вазн тоифасида иштирок этган боксчилардан етти нафари совриндор бўлиши, улардан бештаси финалга чиқиши ва учта олтин медалнинг қўлга киритилиши чиндан ҳам жаҳон спорти учун оламшумул воқеа бўлди. Бежизга бокс бўйича терма жамоамиз барча рақибларини ортда қолдириб Олимпия ўйинларида биринчи ўринни банд этгани йўқ. Тадбирда сўз олган Ўзбекистон бокс федерацияси раисининг биринчи ўринбосари Шерзод Тошматов қилинган ишлар, спортчиларни Олимпия ўйинларига қай тарзда тайёргарлик кўришгани хақида ҳисобот берар экан, олдинда турган режалар ҳусусида ҳам тўхталиб ўтди. Спортда чемпионликка эришишдан кўра уни сақлаб қолиш мушкул деган ибора бор. Айнан шундан келиб чиқиб 2020-йилги Токио Олимпиадасида ҳам ўзбек бокс мактаби тарбияланувчилари муносиб иштирок этишлари, бунинг учун бор имкониятлар ишга солинишига алоҳида урғу берди.
Оғир атлетика федерациясининг ҳисоботини раиснинг биринчи ўринбосари Шаҳрулло Маҳмудов ўтказди. Биз шу пайтга қадар Олимпия ўйинларида спортнинг ушбу туридан бирорта медалга эга эмасдик. Бразилияда эса ҳамюртимиз Руслан Нуриддинов нафақат олтин медалга сазовор бўлди, балки ўзбек спортчилари орасида биринчи бўлиб Олимпия ўйинларининг рекордини янгилади. Демак, ўз ўзидан кўриниб турибдики оғир атлетика федерацияда олиб борилган ишлар ҳам таҳсинга сазовор.
Аммо қилинган ишлар ва эришилган муваффақиятлар билан чекланиб қолмасдан ишлашда давом этишимиз, олдимизга янгидан янги марраларни қўйишимиз ва уларни забт этишимиз талаб этилади. Олдинда бизни навбатдаги муҳим мусобақалар, жаҳон ва Осиё чемпионатлари, Олимпия ва Осиё ўйинлари каби йирик мусобақалар кутиб турибди. Тадбирда Токио мезбонлик қиладиган Олимпия ўйинларига ҳам янги режалар тузилди. Спортчиларни тўрт йилликнинг энг нуфузли мусобақасига муносиб тайёрлаш, бунинг учун барча керакли шароитлар яратиш бўйича хам топшириқлар берилди.
Энди бизни бутун дунё тан олади. Ўзбекистонлик спортчиларга қарши алоҳида тайёргарлик кўришади. Шундай экан кунчиқар юртда бўлиб ўтадиган Олимпия ўйинларига тайёргарликни бугунданоқ бошлаш мақсадга мувофиқ бўлади. Ишонамизки натижаларимиз бунданда яхшиланади ва юртимиз спортчилари мустақил диёримиз шарафини муносиб ҳимоя қилишда давом этишади.
