АҚШда кикбоксинг бўйича 30 дан зиёд давлатнинг спортчилари иштирокида жаҳон чемпионати бўлиб ўтди. Мазкур чемпионатда Ўзбекистон терма жамоаси аъзолари биттадан олтин ва бронза медални қўлга киритди.

Жумладан, Аҳмат Алимбеков вазни 86 килограммгача бўлган спортчилар беллашувида барча рақибини мағлубиятга учратиб, шоҳсупанинг энг юқори поғонасига кўтарилди. 75 килограммгача спортчилар баҳсида Фазлиддин Ваҳобов бронза медаль билан тақдирланди.

Тошкент халқаро аэропортида спортчиларимизни Ўзбекистон ҳаваскор ва профессионал кикбоксинг ассоциацияси вакиллари, оммавий ахборот воситалари ходимлари кутиб олди.