10 октябрь куни Тошкент шаҳридаги Республика олимпия захиралари теннис мактабида Tashkent Challenger–2016 теннис турнирининг яккалик ва жуфтлик баҳсларининг асосий тўр учрашувларига старт берилди, деб хабар бермоқда. «Газета.uz».
ATP рейтингида 687-ўринни эгаллаб турган ўзбекистонлик 18 ёшли теннисчи Жўрабек Каримов биринчи даврада босниялик Мирза Башичга (174-ўрин) қарши баҳс олиб борди ва 4:6, 3:6 ҳисобида имкониятни бой берди.
Ўзбекистон вакилларидан яна бири – 17 ёшли Ҳумоюн Султонов (742-ўрин) биринчи даврада словакиялик Лукаш Лацко (116-ўрин) билан куч синашиб, 4:6, 3:6 ҳисобида мағлубиятга учради.
Дунё рейтингида 1450-ўринда бораётган 23 ёшли ўзбекистонлик Шониғмат Шофайзиев 25 ёшли бельгиялик теннисчи Янник Мертенсга (258-ўрин) қарши кортга чиқди ва якунда 4:6, 2:6 ҳисобида мағлуб бўлди.
Жуфтлик баҳсларида россиялик Михаил Елгин билан тандем ҳосил қилган Ўзбекистоннинг биринчи ракеткаси Денис Истомин биринчи даврада ўзбекистонлик теннисчилардан ташкил топган Шониғмат Шофайзиев ва Ҳумоюн Султонов дуэти устидан 6:4 6:2 ҳисобида зафар қучиб, кейинги босқичга йўл олди.
