Бугун олий лига 27-турининг марказий учрашуви Тошкентда “Локомотив” – “Насаф” жамоалари ўртасида бўлади.

Бу учрашув шубҳасиз футбол ишқибозларини ҳам, мутахасису журналистлар учун ҳам қизиқ. Чунки бу йилги мавсумда чемпионлик учун кураш олиб бораётган “темирйўлчилар” иккинчи давра бошидан ўз таркибини кучли футболчилар билан бойитиб олган “Насаф” жамоаси билан қандай ўйнайди? Биринчи даврадаги Қаршида бўлиб ўтган учрашувда аламли мағлубиятга учраган “аждарлар” бу сафар “Локомотив”дан устун кела оладими? Бугунги учрашувдан кейин ушбу саволларга жавоб топилади.

Мазкур жамоалар бугун Тошкентда 12-бор ўзаро ҳисоб-китоб қилишади. “Насаф”нинг Тошкентдаги сўнгги ғалабасига тўрт йил бўлган бўлса ҳам, ўзаро ўйинларда жамоамиз “Локомотив” устидан 4 марта ғалаба қозонган, “темирйўлчилар”нинг ғалабаси битта кам. Жамоалар Тошкентдаги учрашувларда 4 марта муроса кўчасини ҳам танлашган.  Ушбу жамоаларнинг Тошкентдаги учрашувларида 15 марта дарвозалар ишғол қилинган. Бу нисбат 7-8ни ташкил қилади. Яъни “аждарлар” битта тўп фарқи билан олдинда боришмоқда.

Бугун шунингдек ушбу учрашувда қуйидаги саволларга ҳам жавоб топилади. Ўз сафида номдор ва катта тажрибага эга футболчиларни жамлаган “Локомотив” жамоаси бу ўйинда имкониятларидан қандай фойдаланади? “Насаф”чи? “Насаф” бу йилги мавсумнинг иккинчи даврасида энг муваффақиятли трансферларни амалга оширган жамоалардан бири бўлиб турибди. Маҳаллий ўйинчиларимизда озроқ ҳаяжон бўлиши мумкин. Аммо легионер футболчиларимизда рақибнинг ким бўлишининг фарқи йўқ.

Хуллас, стадионга ташриф буюринг. Ҳақиқий профессионаллар иштирокидаги чиройли футбол учрашувини томоша қилинг!