Навоийнинг “Қизилқум” клубига қарши учрашувдан кейин "Навбаҳор" жамоасига қисқа муддатлик таътил эълон қилинмаганди.

Кеча футболчилар тикланиш машғулотларни бажаришганди. Бугундан бошлаб машғулотлар майдонда давом эттирилмоқда. Бугунги машғулотларга Усмон Асқаралиев бошчилик қилди. Унга бу Мустафо Байрамов ва Дурбек Умаралиевлар ёрдам беришди. Бош мураббий Рустам Дўрмонов эса машғулотларни четдан кузатиш билан чекланди. Шу пайтга қадар жамоа натижаларига бевосита жавобгар ҳисобланган бош менеджер Равшан Бозоров Қаршидаги ўйиндан кейин клуб қароргоҳига келгани йўқ. Бугунги машғулотларда айнан Бозоров томонидан “Навбаҳор”га таклиф этилган мураббийлар Файзулло Аҳмедов ва Арслон Толиповлар ҳам иштирок этишгани йўқ. Жамоа сафига мавсум биринчи ярмини “Навбаҳор”да ўтказиб, маълум вақт давомида жамоа билан бирга бўлмаган ярим ҳимоячи Санжар Асқаралиев қўшилганлигини қўшимча қилиш жоиз. Шу кунларда раҳбарият ва мураббийлар штабида айрим ўзгаришларни рўй бериши кутилмоқда.