Жаҳон чемпионатида ғолиб чиққан терма жамоага топшириладиган кубокнинг дизайнери, италиялик ҳайкалтарош Сильвио Гаццанья 95 ёшида оламдан ўтди, деб хабар бермоқда Gazzetta dello Sport.
«У тинчгина, ухлаб ётганида жони узилди. Кечқурун ухлагани ётди, эрталаб эса нафас олмай қўйди» - деди бу ҳақда унинг ўғли Жорж.
Гаццанья Милан шаҳрининг фахрий фуқароси саналади. У спорт оламидаги жуда кўп совринларнинг дизайнини яратган.
Эслатиб ўтамиз, ФИФА Жаҳон кубоги 1974 йилдан буён топширилади. Унинг баландлиги 36,8 см, 18 каратли олтиндан ясалган, оғирлиги 6,175 кг.