31 октябрь куни Ўзбекистон Миллий олимпия қўмитаси қошидаги Республика спорт тиббиёти илмий-амалий марказида Мюнхендаги “Шен клиника” деб ном олган жаҳонга машҳур шифохоналардан бирининг етакчи орпопед мутахассиси Кристиан Шнайдер меҳмон бўлди.
Германиялик меҳмонни Миллий олимпия қўмитаси бош котиби Ойбек Касимов ва Республика спорт тиббиёти илмий-амалий маркази директори Маъруф Каримовлар кутиб олишди. Ўз навбатида Шнайдер олимпия қўмитаси биноси билан яқиндан танишди.
Энг сўнгги, замонавий медицина ускуналари билан жихозланган спорт тиббиёти илмий-амалий марказини кўздан кечирди ва бу ерда яратилган шароитларга юқори баҳо берди.
Маълумки спорт тиббиётида, хусусан мусобақалар ва машғулотлар пайти орттириб олинган жароҳатларни даволашда германиядаги клиникалар ва немис мутахассислари жаҳонда етакчилардан ҳисобланишади. Ана шундай етук ортопед шифокорлардан саналган Кристиан Шнайдер Марказий Осиёда ягона ҳисобланган пойтахтимиздаги Республика спорт тиббиёти илмий-амалий марказида семинар ўтказди.
“Спорт тиббиёти, ташкилий аспектлар” мавзусида ўтказилган мазкур семинарда Тошкент тиббиёт академиясининг спорт тиббиёти кафедраси ходимлари, жумладан кафедра магистрантлари, клиник ординаторлар, амалиёт ўтаётган шифокорлар ва илмий-амалий маркази вакиллари иштирок этишди.
Семинар иштирокчилари хорижлик етакчи мутахассисдан ўзларини қизиқтирган кўплаб саволларга жавоб олишди.
