Санкт-Петербургнинг Крестовский оролида барпо этилаётган «Зенит Арена» стадиони ФИФА мутахассислари томонидан текширувдан ўтказилди.
Хусусан, мутахассислар стадионнинг суриладиган махсус майдонини кўздан кечириб, уни устида сакраб кўришди ва ЖЧ ўйинлари учун яроқсиз деб топишди. Инспекторлар майдоннинг тебраниш нормативлари 7 баробар бузилганини, у жуда қаттиқ тебранаётганини эътироф этишган.
Энди катта эҳтимол билан сурилма майдон муқим майдон билан алмаштирилади. Акс ҳолда стадионда Конфедерациялар кубоги ва ЖЧ ўйинларини ўтказишга рухсат берилмайди.
Эслатиб ўтамиз, сурилма майдон махсус ғилдиракларга ўрнатилган бўлиб, футбол ўйинлари пайтида стадион ичкарисида, концерт ва шоулар пайтида эса стадион ташқарисига чиқарилиши кўзда тутилганди.
