Бугун Олий лиганинг 28-тур учрашувлари доирасида "Локомотив" сафарда "Қизилқум" меҳмони бўлади.

Турнир жадвалидаги ўрни: "Локомотив" 1-ўринда (65 очко), "Қизилқум" 6-ўринда (44 очко).
Очколар орасидаги фарқ - 21 очко.

Таъриф: Бу ўйинда "Локомотив"га ғалаба жуда зарур. Чунки жамоанинг чемпионлик масаласини ҳал қилишига оз қоляпти. Шу боис "темирйўлчилар"нинг қолган ўйинларда очко йўқотишга ҳақлари йўқ. Агар "Локомотив" навбатдаги икки учрашувда ("Қизилқум" ва "Металлург" билан) ғалаба қозонса, охирги тур ўйинидан олдин ўз тарихида илк марта чемпионликни расмийлаштиради.

Ўз навбатида "Қўзилқум" учун ҳам "Локо" билан кечадиган баҳс жиддий аҳамият касб этади. Негаки навоийликлар мавсумни юқори бешталикда тугатишга ҳаракат қилишяпти. Қолаверса, "Қизилқум"ни ҳозирда ўзидан бир поғона тепада турган "Пахтакор" билан бир очко ажратиб турибди. Мана шуларни ҳисобга олиб бугун Навоийда қизиқарли баҳс кечиши кутилмоқда дея оламиз.

Факт: "Қизилқум" иккинчи даврада 21 очко тўплади. "Локомотив" эса 26 очко йиғган. "Қизилқум" мавсум бошидан бери ўз майдонида ўтказилган беллашувларнинг 6 тасида ғалаба қозонган. Шунингдек, олти бор дуранг ўйнаб, фақат бир марта ютқазган. Жамоа 7-турда "Бухоро"га 1:2 ҳисобида имкониятни бой берган. Тўплар нисбати 22-14.

Факт: "Локомотив" сафарда 13 та ўйинда майдонга тушиб, шундан саккизтасида ғалабага эришди. Уч бор дуранг ўйнаб, иккита баҳсда мағлуб бўлди. Тўплар нисбати 31-16. Ҳозирда "Локомотив" ва "Бунёдкор" сафар ўйинларида энг кам ютқазган жамоалар бўлиб туришибди. Иккала жамоа ҳам иккитадан учрашувда мағлуб бўлган.

Факт: Ўтган йил Навоийда кечган баҳсда "Локомотив" 2:0 ҳисобида ғалаба қозонган. Биринчи таймда Марат Бикмаев ва Санжар Шоаҳмедов томонидан киритилган голлар якунда "темирйўлчилар"га уч очко тақдим этган.

Факт: "Қизилқум" охирги учта уй учрашувида дуранг ўйнади. ("Бунёдкор" 0:0, "Насаф" 3:3, "Қўқон-1912" 1:1). "Локомотив" охирги учта сафар учрашувидан биттасида ғалаба қозонди ва икки бор мағлуб бўлди.