Пойтахтимиздаги 17-сонли умумтаълим мактабида “Биз сенинг фарзандларингмиз, Ўзбекистон!” шиори остида семинар-тренинги бўлиб ўтди.

Юнусобод туман ҳокимияти ташаббуси билан ташкил этилган мазкур тадбирда Рио-де-Жанейрода бўлиб ўтган XXXI ёзги Олимпия ўйинларининг ғолиб ва совриндорлари ҳам иштирок этишди.

Жумладан Олиимпия ўйинлари чемпиони ва Олимпия ўйинларининг рекордчиси Руслан Нуриддинов, Олимпия ўйинлари олтин медали соҳиби Фазлиддин Ғоибназаров, Олимпия ўйинлари кумуш медали совриндори Шаҳрам Ғиёсов ҳамда Олимпия ўйинларининг бронза медали эгалари Рустам Тўлаганов ва Муроджон Аҳмадалиевлар шу куни ўз муҳлислари қаршисида уларни қизиқтирган кўплаб саволларга жавоб беришди.

Тадбирдан кўзланган мақсад Тошкент шаҳридаги халқ таълими муассасаларида таҳсил олаётган ёшлар орасида маънавий-маърифий ва тарбиявий ишларнинг самарадорлигини янада ошириш, кузги таътил даврида уларнинг бўш вақтлари мазмунли ўтказилишини ташкил этишдан иборат бўлиб, ташкилотчилар ўз мақсадларига эришишди деб бемалол айта оламиз.

Зеро юртимиз ифтихорлари билан сухбат жараёнида ўқувчи ёшлар бир олам таассурот олишди. Олимпиячиларимиз ёш мухлисларининг ҳар бир саволларига эринмасдан, батафсил жавоб беришди. Айниқса ўзларининг биринчи устозлари хақида тўлқинланиб гапиришлари, қолаверса ватанга бўлган мухаббат, ягона мақсад йўлида бирлашиш, меҳнатдан чўчимаслик, қўлга киритилган ютуқлардан эса ҳаволаниб кетмаслик масаласида олиб борилган суҳбатларни ўқувчи ёшлар катта хаяжон билан тинглашди.

Тадбир якунида иштирокчилар Олимпия ўйинлари қаҳрамонларидан дастхат олиш, улар билан эсдалик учун суратга тушиш имконига эга бўлишди.