Россиялик теннисчи Мария Шарапова кейинги йил апрелида дисквалификация муддати тугаганидан сўнг яна БМТ эзгу ирода элчиси этиб тайинланади. Бу ҳақда, The Guardian нашрига асосланиб, «Интерфакс» хабар бермоқда.
«БМТ Тараққиёт дастури Мария Шарапова ўзи севган спортга кутилганидан эртароқ қайтиши мумкинлигини билганидан хурсанд бўлди. 2017 йил апрелида унинг дисквалификация муддати тугаши билан биз уни эзгу ирода элчиси мақомида тиклаймиз», — дейилади халқаро ташкилот баёнотида.
Теннисчи тўққиз йил давомида БМТнинг қашшоқлик ва нотенгликка қарши кураш дастурида иштирок этиб келаётган эди. Аммо шу йил март ойида ташкилот у билан муносабатларни тўхтатди. Бунга россиялик спортчи допинг истеъмол қилганини тан олгани ва шу сабабли Халқаро теннис федерацияси томонидан икки йилга спортдан четлаштирилгани сабаб бўлган эди. Кейинроқ Спорт арбитраж суди бу муддатни 15 ойгача қисқартирди.
