ЎФФ матбуот хизмати 15 ноябрь куни бўлиб ўтадиган Жанубий Корея — Ўзбекистон термалари ўйини Саудия Арабистонидан бўлган ҳакам Фаҳад Ал-Мирдасийга ишониб топширилгани ҳақида маълумот берди. Қанотларда унга ватандошлари ёрдам беради.

ЖЧ—2018 3-саралаш босқичи доирасида бўлиб ўтадиган беллашувга қадар ҳам Фаҳад Ал-Мирдасий Жанубий Корея ҳамда Ўзбекистон иштирокидаги икки беллашувда ишлаган. Ҳар икки ўйин ўзбекистонлик футболчиларнинг мағлубияти билан якунига етган.

2015 йилнинг 22 январь куни Ўзбекистон ва Жанубий Корея термалари Осиё Кубогининг чорак финалида ўзаро тўқнаш келди. Миржалол Қосимов бошчилик қилаётган Ўзбекистон терма жамоаси асосий вақтни 0:0 ҳисобида якунлаган бўлса-да, қўшимча дақиқаларда 2 та гол ўтказиб юборди. Учрашувни Ал-Мирдасий бошқариб борганди.

Орадан бир йил ўтиб, 2016 йилнинг 13 январь куни саудиялик ҳакам Ўзбекистон ва Жанубий Корея олимпия термалари иштирокидаги ўйинда ишлади. Осиё Чемпионати гуруҳ босқичи доирасидаги ўйинда кореяликлар 2:1 ҳисобида зафар қучди. Ўша мағлубиятдан кейин Самвел Бабаян бошчилик қилган Ўзбекистон олимпия терма жамоасининг Рио—2016 Олимпиадасида иштирок этмаслиги аниқ бўлди.

Маълумот учун, Самвел Бабаян қабул қилиб олгунига қадар ҳам Ўзбекистон олимпия терма жамоаси Фаҳад Ал-Мирдасий бошқарган икки беллашувда иштирок этганди. Осиё Чемпионатининг саралашида Бангладеш 4:0 ҳисобида мағлуб этилган, ҳал қилувчи ўйинда эса Сурияга имконият бой берилган — 1:2.

Жанубий Корея ва Ўзбекистон миллий терма жамоаларининг ЖЧ—2018 йўлидаги тўқнашуви 15 ноябрь куни Сеулдаги “World cup stadium”да Тошкент вақти билан 16:00 да старт олади.